ភ្នំពេញ៖ បន្ទាប់ពីព្រឹទ្ធសភាបានបើកសម័យប្រជុំដំបូងរបស់ខ្លួននៅព្រឹកថ្ងៃទី៣ ខែមេសា ឆ្នាំ២០២៤ នេះសមាជិកព្រឹទ្ធសភាទាំងអស់បានសម្រេចបោះឆ្នោតជ្រើសតាំងប្រធាននិងអនុប្រធានទាំងពីរនៃព្រឹទ្ធសភា ដោយក្នុងនោះសម្ដេចតេជោ ហ៊ុន សែន ត្រូវបានសមាជិកព្រឹទ្ធសភាទាំងអស់បោះឆ្នោតគាំទ្រឲ្យក្លាយជាប្រធានព្រឹទ្ធសភា ខណៈលោក ប្រាក់ សុខុន ជាអនុប្រធានទី១ និងលោក អ៊ុច បូររិទ្ធ ជាអនុប្រធានទី២។
លោក ប្រាក់ សុខុន ត្រូវបានសមាជិកព្រឹទ្ធសភាបោះឆ្នោតគាំទ្រក្នុងសំឡេង ៦២លើ៦២សំឡេង និងលោក អ៊ុច បូររិទ្ធ ទទួលបានការគាំទ្រក្នុងសំឡេង៦២លើ៦២សំឡេង។
គួរឲ្យដឹងផងដែរថាលោក ប្រាក់ សុខុន គឺជាអតីតឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសក្នុងអាណត្តិទី៦ នៃរាជរដ្ឋាភិបាលកម្ពុជា ខណៈលោក អ៊ុច បូររិទ្ធ ត្រូវបានព្រះមហាក្សត្របញ្ចប់តំណែងពីទេសរដ្ឋមន្ត្រីទទួលបន្ទុកបេសកកម្មពិសេសកាលពីថ្ងៃទី២ ខែមេសាម្សិលមិញ៕
